iltam zumrā rašubti ilātim
litta''id bēlet iššī rabīt igigī
ištar zumrā rašubti ilātim
litta''id bēlet ilī nišī rabīt igigī

šāt mēleṣim ruāmam labšat
za'nat inbī mīkiam u kuzbam
šāt mēleṣim ruāmam labšat
za'nat inbī mīkiam u kuzbam

šaptīn duššupat balāṭum pīša
simtišša ihannīma ṣīhātum
šarhat irīmū ramû rēšušša
banâ šimtāša bitrāmā īnāša šitārā

eltum ištāša ibašši milkum
šīmat mimmami qatišša tamhat
naplasušša bani bu'āru
baštum mašrahu lamassum šēdum

tartāmī tešmê ritūmī ṭūbī
u mitguram tebēl šīma
ardat tattadu umma tarašši
izakkarši innišī innabbi šumša

ayyum narbiaš išannan mannum
gašrū ṣīrū šūpû parṣūša
ištar narbiaš išannan mannum
gašrū ṣīrū šūpû parṣūša

gaṣṣat inilī atar nazzazzuš
kabtat awassa elšunu haptatma
ištar inilī atar nazzazzuš
kabtat awassa elšunu haptatma

šarrassun uštanaddanū siqrīša
kullassunu šâš kamsūšim
nannarīša illakūši
iššû u awīlum palhūšīma

puhriššun etel qabûša šūtur
ana anim šarrīšunu malâm ašbassunu
uznam nēmeqim hasīsam eršet
imtallikū šī u hammuš

ramûma ištēniš parakkam
iggegunnim šubat rīšātim
muttiššun ilū nazzuizzū
epšiš pîšunu bašiā uznāšun

šarrum migrašun narām libbīšun
šarhiš itnaqqišunūt niqi'ašu ellam
ammiditāna ellam niqī qātīšu
mahrīšun ušebbi li'ī u yâlī namrā'i

išti anim hāmerīša tēteršaššum
dāriam balāṭam arkam
madātim šanāt balāṭim ana ammiditāna
tušatlim ištar tattadin

siqrušša tušaknišaššu
kibrat erbe'im ana šēpīšu
u naphar kalīšunu dadmī
taṣammissunūti ana nīrīšu

bibil libbīša zamar lalêša
naṭumma ana pîšu siqri ea īpuš
ešmēma tanittaša irissu
libluṭmi šarrašu lirāmšu addāriš

ištar ana ammiditāna šarri rā'imīki
arkam dāriam balāṭam šurqī