Danz

Ballett

Danz (vo altfranzösisch: danse, vo wo das chunnt, wäiss mä nid) isch d Umsetzig vo Inspirazion (mäistens Muusig und oder Rhüthmus) in Beweegig. Danze isch e Ritual, e Bruuch, e daarstellendi Kunstgattig, e Bruef, e Sportart, e Therapiiform, e Form vo sozialer Interakzion oder äifach e Usdruck vo Gfüül.

Allgemäins

S Danze het in dr Gsellschaft e Hufe Funkzione, cha aber au Sälbstzwäck oder Zitverdriib si.

Im ritualisierte Danze cha mä Emozione und Zämmeghörigkäit usdrucke. Es cha as e festlige Iniziazionsritus d Ufnaam vo nöije Mitgliider in e Gmäinschaft begläite, öbbe wenn jungi Mäitli bim Debütantinneball dr Gsellschaft vorgstellt wärde oder wenn Schüeler bim Abschlussball fiire, ass si d Brüefig bestande häi. Vor eme religiöse Hindergrund eert mä mit Tanzritual Götter oder bittet sä um Hilf, weert böösi Gäister ab oder verdribt sä.

S Danze as Sport förderet dr Ufbau vo Muskle, d Motorik, d Koordinazioon und dr Gliichgwichtssinn. Wenn öbber komplexi Bewegigsablöif erfolgriich leert, blaant und usfüert, hilft das sim Sälbstverdraue und eme gsunde Verheltnis zum äigene Körper.

As Kunstform stellt mä mit Danze Gfüül und Handlige daar. D Mimik, d Gestik und die ganzkörperlige Danzbewegige bilde zämme mit dr Muusig s aaspruchsvolle Aarbetsmaterial vom künstlerische Danz, wo im Zueschauer d Eliganz und d Usdruckschraft vom menschlige Körper vor Auge füert.

Danzforme

Zue de underschidliche Danzforme ghöre de Volchsdanz, wo in braktisch alle Kulture in äinere Form oder ere andere vorchunnt, de Gsellschaftsdanz mit de Hauptrichdige Walzer, Disco, Swing, Latino und Tango, de Schaudanz wie Step, Hip-Hop, Breakdance, Buuchdanz, Go-Go oder Striptease, de Tournierdanz und de Büünidanz drunder s klassische Ballett und s modärne Danztheater.

Verschidnigi Danzstiil sind under anderem: Chaconne, Flamenco, Gavotte, Passacaille, Samba, Sarabande und Square Dance.

Litratuur

• Kathrin Bonacker, Sonja Windmüller (Hrsg.): Tanz! Rhythmus und Leidenschaft. Hessische Blätter für Volks- und Kulturforschung 42. Jonas Verlag, Marburg 2007, ISBN 978-3-89445-389-3.
• International encyclopedia of dance,uusegee vo dr Selma Jeanne Cohen, Oxford University Press, New York 1998, 6 Bänd,